சிங்கைத் தாயின் புதழ்வன்

சிங்கைத் தாயின் புதழ்வன்
           சீரிய குடும்பத் தலைவன்
இங்கு வந்த போதும்
          ஏற்றம் குன்றா வலியோன்
சங்க கால மரபை
          சமைத்து வாழும் மனிதன்
மங்காப் புகழை யென்றும்
          மதித்து வாழும் தமிழன்

சிங்கை நாட்டை யாளும்
           சிறப்பு வாய்ந்த அரசால்
எங்கள் தமிழைப் போற்ற
           ஏற்றுக் கொண்ட வழியில்
சங்க மொன்றை யமைத்துச்
           சலுகை பலவும் பெற்றுப்
பங்கு கொள்ளும் மாதம்
           பலரும் கூடும் மாதம்

ஏப்ரல் மாதம் முழுதும்
          எங்கள் மொழியைப் போற்றிக்
காப்புக் கவிகள் பாடிக்
          களிப்பு கொள்ளும் புலவன்
மூப்பு கொள்ளாத் தமிழை
         மூன்று தமிழாய்க் கொண்டு
காப்பி யங்கள் படைத்துக்
          காக்கு மெங்கள் மறவன்

மழலை குன்றாக் குழந்தை
          மேடை யேறிப் பேசும்
செழிப்பு மிக்கத் தமிழைச்
         சிந்தை கொள்ளும் மாதம்
உழைக்கும் தமிழ ரெல்லாம்
          ஒன்று கூடும் அரங்கில்
செழுமை நிறைந்த தமிழால்
          சிறப்புச் செய்யும் மாதம்