"பிடித்த உணவு"

அண்ணன் தம்பி
          அக்கா தங்கை
அன்னை தந்தை
          அனைத்து உறவும்
அன்பு கொண்டு
          அமர்ந்து இருந்து
உண்ணும் உணவே
          உயர்ந்த உணவு

               (வேறு)

காயமென்ற கட்டுடலைக்
           களைப்பின்றி வைத்திடவும்
பாயின்றி மெத்தையின்றி
           படுத்தவுடன் உறங்கிடவும்
நோயின்றி நொடியுமின்றி
           நலமோடு வாழ்ந்திடவும்
வாய்திட்ட உணவுதானே
           வளமான நல்லுணவு

              (வேறு)

நசிக்கிவரும் நாட்டாமை
           நாடுகளின் பிடிதன்னில்
நசிந்துவரும் நாடுகளும்
            நடைபிணமாய் யிருக்கையிலே
வசிப்பிடந்தான் ஏதுமின்றி
            வறுமையிலே வாழ்ந்தாலும்
பசித்திட்ட வயிற்றுக்குப்
            பழஞ்சோறும் கிடைப்பதில்லை

பசியோடு உணவின்றிப்
            பாரினிலே பலரிருக்க
வசிப்பதற்கு வீடின்றி
           வீதியிலே குடியிருக்க
பசிபோக்கும் பாலின்றிப்
            பாலகரும் அழுதிருக்க
புசிப்பதற்குப் புலாவோடு
             புதுவுணவும் கிடைப்பதெங்கே
   
              (வேறு)

பிடித்திட்ட உணவோ யில்லை
           பிடிக்காத உணவோ பசிக்குப்
பிடியளவு கிடைத்தால் கூடப்
           பிள்ளைக்குக் கொடுத்த பின்னே
மடிதடவி மகிழ்வார் அன்னை
            மனநிறைவு கொள்வார் பின்னும்
படியளந்தார் பண்பைப் போற்றிப்
            புகழ்ந்திடுவார்  கண்ணால் பனிப்பார்