நாள் : 16 (16/04/2021)

தலைப்பு : தோல்விகள் தோற்பதற்கல்ல 

 

எண்ணிய எண்ணமும் எடுத்த முயற்சியும்

இருப்பினைக் கொடுத்திட இயலா நிலையிலும்

கண்ணிய முறையிலே கடமை யாற்றிடும்

கருத்தினைத் தாங்கிய கொள்கைப் பிடிப்பினை

திண்ணிய உளத்தினில் தெளிவாய்ப் புகுத்திடும்

திறன்மிகு உழைப்பினைக் கொடுத்தே முயன்றிட

கண்களின் எதிரினில் காணும் காட்சியில்

களித்திடக் கூடிய இன்பம் தோன்றிடும் 

பலமுறை தோற்பினும் எடுத்த காரியம்

பயனுடன் முடித்திடும் பணியைச் செய்திடு

பலமெனக் கருதிடும் பெரியோர் சொல்படி

பாதைக ளமைந்திட பயணம் கொண்டிடு

உலகியல் நடைமுறை உன்னுள் ஒளிவிட

ஓய்ந்திடா மனமதில் ஊக்கம் பெற்றிடு

சிலமுறை முயன்றிடு முரிய முயற்சியும்

சீரிய வெற்றியைப் பெற்றே கொடுத்திடும்

 

கடலினில் அலைந்திடும் அலைபோல் நெஞ்சினில்

கலைந்திடா ஆசைகள் உன்னுள் பரவிட 

கடனெனச் செய்திடும் முயற்சி முழுவதும்

காட்டினுள் வெளிப்படும் ஒளிபோல் மங்கிடும்

உடலினில் தோன்றிடும் உற்சா கவலிமை

உளம்தனி லுயர்ந்திடும் போதே கொண்டிடும்

கடமையில் கருத்தினில் தொடர்ந்து முயன்றிட

கரத்தினில் தவழ்ந்திடும் வெற்றி தோன்றிடும்