இறையாய் என்றும் இருப்பாய் நீயே

சிங்கைத் தாயே சிங்கைத் தாயே

      சிறப்புடன் விளங்கும் சிங்கைத் தாயே

எங்கள் வாழ்வு ஏற்றம் பெறவே  

      எழுந்து வந்த ஏணி நீயே

அன்பும் அறனும் அணியாய் அணிந்து

      அங்கம் எல்லாம் அழகு சேர்த்து

அன்னை வடிவாய் அருளின் உருவாய்

அமைதி வாழ்வை அளித்தாய் நீயே

பல்லின மக்கள் பண்புடன் பழக

      பன்மொழிப் புலமை பாங்குடன் ஓங்க

வல்லமை யோடு வளமையும் சேர்த்து 

வறுமை போக்கி வளர்த்தாய் நீயே

கல்வி கேள்வி கலைகள் யாவையும்

      கருத்தாய் விளக்கிக் களிப்புச் சேர்க்க

எல்லை யில்லா இன்பம் நல்கும்

      இறையாய் என்றும் இருப்பாய் நீயே

தேசிய தினத்தின் மேன்மையை எங்கள்

      தேசம் வாழும் சிரியோர் பெரியோர் 
பேசிப் போற்றிப் புகழ்ந்திட நல்ல 

      பெருமை பெற்றே உயர்வாய்  நீயே

உவகை கொண்ட உள்ளத்தால் நாங்கள்  

      உன்னைப் போற்றிப் பாடவே என்றும்

சிவப்பு வெள்ளை வண்ணமாய் எங்கள்

      சிங்கைக் கொடியில் வீற்றிருப் பாயே

                                                    கணேசுகுமார் பொன்னழகு.