என் குறிக்கோள் 

உலக்குப்பெறா ஊர்க்கதையை உவமையோடு உருவகமாய்

      ஊதியூதிப் பெரிதாக்க உண்மையில்லாப் பேச்சோடு

விலக்கமற்ற வினாவொன்றும் விரைந்தோடி வருவதனால்

விலையில்லா நன்மதிப்பு வீணாகிப் போவதுண்டு

இலக்கென்றால் என்னவென்று இளக்காரம் செய்ததோடு

இனம்புரியா வினாக்களையும் என்னுள்ளம் கேட்டதுண்டு

இளந்தமிழின் இலக்கியங்கள் எடுத்துரைக்கும் கருத்துகளால் 

எனக்கான இலக்குகளை எதுவென்று அறிந்துகோண்டேன்

செந்தமிழின் செழுமையினைச் சீராகச் செதுக்கிவைத்துச்

      செம்மாந்து நிற்கின்ற சீராளர் இலக்கியத்தைச்

சிந்தாமல் சிதறாமல் சிறப்புடனே சொல்லிடவே

செந்தமிழைக் கற்பிக்கும் சீரியபணி யாற்றிடுவேன்

மயிலாடும் பாறையிலும் மலராடும் சோலையிலும்

      மதிமயங்கிச் சுற்றுகின்ற மாலைநேர வேளையிலும்

 

வெயிலோடும் மழையோடும் உறவாடும் உறவுகளை

வெள்ளந்தி மனத்தோடு விரும்பித்தான் பாடிடுவேன்

தமிழ்மொழியின் மூச்சாகத் தயக்கமில்லாப் பேச்சாகத்

தகையோர்கள் படைத்திட்ட தரமான படைப்போடு

தமிழன்னை அழகுபெறத் தனித்தமிழில் படைப்புகளும்

      தரமான ஆய்வுகளும் தயங்காது செய்திடுவேன்

உயர்வான படைப்பினிலே ஒளிந்திருக்கும் உண்மைகளை

உவமையோடு உருவகமாய் ஒப்பிட்டுக் காட்டிடவே

பயன்மிக்க ஆய்வுகளைப் பார்போற்றும் படைப்புகளாய்ப்

படைப்பதோடு அல்லாமல் பகிர்ந்திடவும் வழிசெய்வேன்

                                                                             கணேசுகுமார் பொன்னழகு.