தமிழே தமிழே முத்தமிழே

தமிழே தமிழே முத்தமிழே

      தரணி போற்றும் தாய்த்தமிழே

அமிழ்தம் உந்தன் மொழியாகும்

      அதுவே எங்கள் விழியாகும்

நிமிர்ந்த நெஞ்சம் யாம்பெற்று

      நேரிய வாழ்வு வாழ்ந்திடவே

தமிழில் வந்து உதித்ததனால்

      தகையோர் போற்ற நடக்கின்றாய்

குவித்து வைத்த இலக்கியங்கள்

      கூறும் நல்லக் கருத்துகளால்

புவியில் உள்ளோர் உன்புகழைப்

      போற்றிப் பாடி வரவேற்றும்

நவிலும் வார்த்தை அழகோடு

      நாளும் உன்னை வாழ்த்திடவும்

செவிக்கு ஏற்ற செந்தமிழாய்ச்

      சிறந்த முறையில் விளங்குகிறாய்

சங்கப் புலவர் கூட்டணியில்

      சந்தம் பெற்ற படைப்புகளை

அங்க மெல்லாம் அணிகலனாய்

      அணிந்து வந்த அருந்தமிழே

பங்க மில்லாப் படைப்புகளைப்

      பாரில் பெற்றச் சிறப்போடு

எங்கள் நாடாம் சிங்கையிலும்

      ஏற்றம் பெற்றே வாழ்கின்றாய்

எங்கும் எதிலும் எப்போதும்

      இளைமை மாறா இன்தமிழே

மங்கா உந்தன் பெருமைகளை

      மாற்றார் போற்றிப் புகழ்ந்தாலும்

சங்கம் வடித்தப் பாட்டிசையைச்

      சான்றோர் பலரும் தந்தாலும்

சிங்கைத் தமிழர் படைப்பினிலும்

      சிறப்புப் பெற்றே செழிக்கின்றாய்

ஏற்றம் பெற்ற தமிழ்மொழியை

      எங்கள் நாட்டில் கொண்டாட

பற்றுக் கொண்ட தமிழரும்

      பாங்காய் வந்து சேர்ந்திடவும்

வேற்றி னத்து சான்றோரும்

விரும்பி வந்து கலந்திடவும்

ஏற்ற மாதம் இதுவென்று

ஏப்ரல் முழுதும் வளம்வருவாய்

                                 கணேசுகுமார் பொன்னழகு.