கிராமத்துக் கீதம்
மாமே பெத்த புள்ள
மாநிறத்து சின்னப் புள்ள
சாமை அரிசி குத்தி
சமைக்கிறியே என்ன புள்ள
கண்ணங் குழி விழ
கண்சிமிட்டிப் பார்க்கும்புள்ள
எண்ண மெல்லாம் சிறகடிக்க
இங்கு வந்து பேசுபுள்ள
சோளவளக் காட்டுக்குள்ள
சும்மா நின்னு பேசினாலும்
ஆளரவம் கேட்குதுன்னு
அங்குமிங்கும் பாத்த புள்ள
ஒத்தயடி பாதை ஒன்னு
ஊரோரம் போகுதுன்னு
அத்தமக ரத்தினமே
அங்கு வரச் சொன்னபுள்ள
பட்டுமேனி நோகாமா
பந்தளுக்குள் வளர்ந்தபுள்ள
சிட்டாட்டம் பறக்குறீயே
செத்தநின்னு பேசுபுள்ள
கட்டொழுங்கு குழையாம
கண்ணியமா வளர்ந்தபுள்ள
கட்டழகன் நானிருக்கேன்
கைகோர்க்க வாடிபுள்ள
எதிர்வீட்டு ஜன்னல்வழி
எட்டியெட்டி பார்த்தபுள்ள
எதிரேநான் நிக்கிறேனே
இங்குவந்து பேசுபுள்ள
அதிகாலை வேளையிலே
ஆத்துக்குப் போறபுள்ள
புதிரான கேள்வியாலே
புருவத்தைச் சுழிப்பதென்ன
தொலைதூரம் நானிருக்கேன்
துன்பத்தில் தோய்ந்திருக்கேன்
தொலைபேசியில் பேசிநீயும்
துன்பத்தைப் போக்குபுள்ள
அந்திசாயும் நேரத்திலே
அம்மாவோடு போறபுள்ள
முந்திநீ போனாலும்
முகம்காட்டிப் போடிபுள்ள
சந்தியோரம் நானிருக்க
சாடைபேசிப் போறவளே
பிந்தி நடைபோட்டு
பின்னழகைக் காட்டுறீயே
கருத்துகள் இல்லை:
கருத்துரையிடுக