உளமாற வாழ்த்துப் பாடுகிறோம்

அன்பு என்ற ஒன்றையே

ஆர மாகப் பூண்டவர்

பண்பும் பரிவும் காட்டியே

பழகும் தன்மை கொண்டவர்

ஆற்ற லோடு அறிவையும்

அழகுத் தமிழின் புலமையும்

ஆற்றின் ஒழுக்காய்க் கொண்டவர்

அமர கீதா என்பவர்

கன்னல் மொழியாம் தமிழையே

கவச மாக அணிந்தவர்

எண்ணும் எண்ணக் கருத்தையே

எடுத்து இயம்பும் வல்லவர்

எங்கள் பள்ளி யூனிட்டி

ஏற்றம் பெற்று உயரவே

பங்க மில்லா உழைப்பினைப்

      பணியாய்க் கொண்டு உழைத்தவர்

தாய்மொழி கற்பிக்கும் தகையோரில்

      தமிழைச் சார்ந்து வழிநடத்தி

தாய்போல் விளங்கும் பண்பாளர்

      தங்கமனம் கொண்ட நம்கீதா

தாய்மொழிப் பாடத்தில் ஒன்றாகத்

      தமிழ்மொழி படிக்கும் மாணவர்க்கு

வாய்மொழி யோடு இணையத்தின்

      வளத்தையும் இணைத்தே கற்பிப்பார்

இணையில்லா இந்திய இசைகளை

      இன்றைய மாணவரும் இசைத்திட

இணைப்பாட வகுப்பில் ஒன்றாக

      இணைத்திடச் செய்தார் நம்கீதா

எத்தனைச் செயல்கள் செய்தாலும்

      இன்முகம் கொண்டு செய்வதால்

அத்தனைச் செயல்களும் வெற்றியாய்

அமைந்திடச் செய்வார் நம்கீதா

புதியவர் பழையவர் பாராது

      புன்னகை யோடு பழகியே

புத்து ணர்ச்சி தருகின்ற

      புதுமைப் பெண்தான் நம்கீதா

அவனி போற்றும் தமிழ்போல்

அமர கீதா வாழவே

உவகை கொண்ட புன்னகையால்

உளமாற வாழ்த்துப் பாடுகிறோம்

                 புத்தகம்

புத்தகம் நல்ல புத்தகம்

      புதிய புதிய புத்தகம்

நித்தம் வந்து குவியுதாம்

      நம்ம ஊரு கடையிலே

கருத்து விளக்கக் கதைகளும்

      கடவுள் சார்ந்த கதைகளும்

பொறுப்பாய் தன்னுள் தாங்கியே

      பதித்து வந்தப் புத்தகம்

கற்றுக் கொடுக்கும் கல்வியும்

கருணை கொண்ட நீதியும்

பெற்றுத் தந்த புத்தகம்

      பெருமை சொல்லும் புத்தகம்

அம்மா அப்பா இருவரும்

      ஆசை யோடு வாங்கியே

நமக்குக் கொடுக்கும் புத்தகம்

      நல்ல தமிழ்ப் புத்தகம்

சிறுவர் முதலாய் பெரியவர்

      சிறப்பாய்ப் படிக்கும் புத்தகம்

அருமை யான முறையிலே

      அடுக்கி யுள்ள புத்தகம்

பள்ளிப் பிள்ளைகள் யாவரும்

      படித்துப் பயிற்சி செய்திட

நல்ல நல்ல புத்தகம்

      நாளும் கிடைக்கும் வாருங்கள்

பள்ளி

பள்ளிக் கூடம் போகலாம்

      பாடம் தன்னைப் படிக்கலாம்

துள்ளி ஓடும் வயதிலே

      துன்ப மின்றி வாழலாம்

பரந்து விரிந்த பள்ளியில்

      பார்க்கும் இடத்து அருகிலே

மரங்கள் சூழ்ந்து நிற்குமே

      மலர்கள் மணத்தை வீசுமே

     

சின்னஞ் சிறுவர் பலருமே

      சேர்ந்து படிக்கும் பள்ளியில்

அண்ணன் தம்பி போலவே

      அன்பாய் பழகிப் படிப்போமே

கன்னித் தமிழைக் கற்கவும்

      கலைகள் யாவும் அறியவும்

எண்ணம் கொண்டு நாளுமே

      ஏற்ற மோடு படிக்கலாம்

     

கல்வி கற்கும் வேளையில்

      கற்றுக் கொடுத்த ஆசானை

நல்ல எண்ணம் கொண்டுமே

      நாளும் தொழுது வணங்கலாம்

பட்டப் படிப்பு யாவையும்

      படித்து வந்த போதிலும்

கட்டு ஒழுங்கு மீறாமல்

      கவன மோடு இருக்கலாம்

நட்பு

நட்பு நல்ல நட்பு

      நாட றிந்த நட்பு

நட்பு இல்லா வாழ்வை

      நலியச் செய்யும் நட்பு

உயர்வு தாழ்வு இன்றி

      உயிராய்ப் பழகும் நட்பு

அயர்வு கொண்ட போதும்

      அழிந்தி டாத நட்பு

கள்ளம் கபடம் இன்றி

      கனிவாய்ப் பழகும் நட்பு

உள்ளம் மகிழத் தானே

      உண்மை பேசும் நட்பு

இன்பம் வந்த போது

      இனிமை கொள்ளும் நட்பு

துன்பம் வந்திட் டாலும் 

      துவண்டி டாத நட்பு

பட்டி தொட்டி எங்கும்

      பரந்து விரிந்த நட்பு

கட்டித் தங்கம் போல

      கறையில் லாத நட்பு

காற்று வீசும் திசையாய்

      கலந்து இருக்கும் நட்பு

நேற்று இன்று என்றும்

      நேர்மை குன்றா நட்பு

தமிழ்

எங்கள் பாப்பா எழிலம்மா

             ஏற்றம் பெறவே “வா”யம்மா

தங்கப் புதையல் மொழியம்மா

            தரணி போற்றும் தமிழம்மா

சிங்கை நாட்டைப் பாரம்மா

            சிறப்பு வாய்ந்த நாடம்மா

எங்கள் நாட்டைப் போலவே

            எங்கும் உண்டோ கூறம்மா