கலாமாம் எங்கள் கலாமாம்

 

கலாமாம் அப்துல் கலாமாம்

கனவு காணச் சொன்ன

கலாமாம் அப்துல் கலாமாம்

 

உலகோ ரெல்லாம் போற்ற

உயர்ந்த நிலையில் இருக்கும்

உண்மை யான தலைவர்

 

ஏற்றுக் கொண்ட பதவி

ஏற்றம் மிகுந்த தெனினும்

எளிமை யான மனிதர்

 

ஓய்வு பெற்ற போதும்

ஓய்ந்தி ருக்கும் நினைவை

உள்ளம் கொள்ளா மனிதர்

 

பள்ளி தோறும் சென்று

படிப்பின் மேன்மை யுணர்த்திப்

படிக்கச் சொன்ன ஆசான்

 

மழைநீர் வேண்டு மென்றால்

மரங்கள் தேவை யென்ற

மாண்பைச் சொன்ன மனிதர்

 

சின்ன வயது கனவில்

சிறகை முளைக்கச் செய்யும்

சிந்தை வளர்க்கச் சொன்னார்

 

கண்ட கனவை நினைவில்

கொண்டு வந்து காட்ட

கடிதாய் வுழைக்கச் சொன்னார்

 

துன்பம் துரத்தும் போதும்

திரும்பி நின்று பார்த்தால்

தூர வோடும் என்றார்

 

எண்ணும் ஆசை யாவும்

ஏற்றம் மிகுந்த ஒன்றாய்

இருக்க வேண்டும் என்றார்

 

கற்றுக் கொடுக்கும் குருவைக்

கடவுள் நிலையில் வைத்து

கைகள் கூப்பச் சொன்னார்

 

 

 

தலைமுறை இடைவெளி (தந்தையும் மகனும்)

வாழும் வாழ்க்கைப் பாதையில்

      வறுமை வந்த போதிலும்

வாழும் வழியைப் பெற்றிடும்

      வளமை யான கல்வியைக்

காலம் கருதி யளித்திடக்

      குருவைப் போல்தன் கடமையை  

நாளும் செய்து முடிக்கவே

      நல்ல எண்ணம் கொண்டவர்

 

வலிமை குன்றாத் தோற்றத்தில்

      வயதும் முதிர்ச்சி கண்டிட

இளமைப் பொலிவு மறைந்திடும்

      ஈர்க்கும் சக்தி குறைந்திடும்

அலையும் ஆசை மனத்தினில்

      அவல எண்ணம் தோன்றிடும்

முழங்கும் வாஞ்சைப் பேச்சினில்

      முரண்மை சொற்கள் சூழ்ந்திடும்

 

அழகு நிறைந்த பசும்வெளி

      ஆசை மகனோ டமர்ந்திட

அழகு பறவை குருவியும்

      அருகே அமர்ந்து ஒலித்திட

மழலை கேட்கும் கேள்விபோல்

      மாற்ற மில்லாக் கேள்வியைப்

பழமை நினைவில் பலமுறை

      பாச மகன்முன் கேட்டிட

 

பொறுமை யற்ற மகனவன்

      பெரிதாய்க் கத்திப் பேசவே

வெறுப்பைக் காட்டும் மகனிடம்

      வேறு வார்த்தை மொழிந்திட

விருப்ப மில்லாப் பொழுதிலும்

       வளர்த்த வளர்ப்பில் குற்றமோ

பொறுப்பை உணராக் குற்றமோ

       பொதுவி லறிய எண்ணினார்

 

பகைவர் போலப் பேசிடும்

       பெற்ற மகனின் எரிச்சலை

அகற்ற வேண்டும் என்பதால்

       அன்றே அன்பாய் எழுதிய

அகக்கு றிப்பு நூலினை

       அளித்துப் படிக்கக் கூறினார்

அகக்கு றிப்புச் செய்தியை

       அறிந்து கொண்ட மகனுமே

 

பந்த பாசப் பிணைப்புடன்

       பரித விக்கும் முதுமையில்

இந்த உலக வாழ்க்கையை

       ஈகை செய்யத் துணிந்திடும் 

விந்தை மிகுந்த நடத்தையால்

       விலக்க முடியா அன்பினைத்

தந்தை காட்டும் வழியினில்

       தானு மளிக்கத் தொடங்கினான்

                                                      கணேசுகுமார் பொன்னழகு

                                                       சிங்கப்பூர்.

 

கிழப் பிள்ளையின் குறிப்பேடு

 

இளமைப் பருவம் தூய்ந்திட

      ஈர முதுமை பெற்றதால்

வளமை யான சுரப்பிகள்

      வறட்சி நிலைக்குப் போகவே

வளப்பம் மிகுந்த பார்வையும்

      வரைய றைக்குள் சுருங்கிட

அழகு நிறைந்த மகனுடன்

      அமர்ந்து பேசும் காட்சியில்

 

மழலை மாறா வார்த்தையில்

      மகிழ்ந்து குழைந்து மொழிந்திட

பழகும் பிள்ளைப் பேச்சினைப்

      பருகி யின்பம் துய்க்கையில்

மழலை யன்னக் கேள்வியை

      மாற்ற மின்றித் தொடர்ந்திட

விளக்கம் கூறும் தந்தையும்

      வெறுப்பைக் கக்கும் மகனுமே!

 

கணேசுகுமார் பொன்னழகு

சிங்கப்பூர்

 

மனமுவந்து வாழ்த்துகிறேன்!

 

நான்காண்டு காலம்

      நட்புடனே பழகித்

தேனுண்ணும் வண்டாய்த்

      தினந்தோறும் வந்து

நான்சொன்ன தமிழை

      நன்முறையில் கற்று

ஆண்டிறுதித் தேர்வை

      அழகாக எழுதி

 

வானுயர  வாழ்வை

      வளர்ச்சியெனக் கொண்டு

மேன்மேலு முயரும் 

      மேற்படிப்பைப் படிக்க

மான்போலத் துள்ளி

      மகிழ்வுடனே செல்லும்

மாணவருக் கோயென்

      மனமுவந்த வாழ்த்து

 

நான்பார்க்கும் பணியில்

      நல்லெண்ணம் கொண்டு

நான்கினத்தின் உறவை

      நன்முறையில் சொல்ல   

வீண்வாத மின்றி

      விருப்புடனே கேட்ட

மாணவருக் கோயென்

      மகிழ்வான வாழ்த்து