நாள் 32 (14.06.2020)

'ஒரே ஒருமுறை சுவாசித்துக்கொள்

சைகைகாட்டும் கைபோலச் - சற்று

சாய்ந்திருக்கும் கிளைகளோடு

வைகையாற்றுக் கரையோரம் - பரந்து

வளர்ந்திருக்கு மாலமரம்

கூகைமுதல் குருவிவரை - மிகக்

குதுகலமாய் அமர்ந்திருக்க

தோகைமயில் துடிப்புடனே - தன்

துணையோடு யாடிவரும்

ஆலையில்லா ஆற்றோரம் - மிக

அழகழகாய்ப் பூத்திருக்க

சோலையொன்றை வார்த்ததுபோல் - அந்தச்

சுற்றியுள்ள இடம்மாறும்

மாலைவெயில் மஞ்சளாகிப் - பின்

மையிருட்டாய் மாறயிலே

சோலையெங்கும் பூத்துள்ள - மலர்

சுகந்தத்தைப் பரப்பிவரும்

கொள்ளைகொள்ளு மழகோடு - இந்தக்

குறையில்லா வாசனையும்

எல்லையின்றிப் பரவியவை - இன்று

இல்லாமல் போனாலும்

உள்ளிருக்கு மிதயத்தால் - ஒரே

ஒருமுறைநான் சுவாசித்துக்

கொள்வதற்குச் சுகமான - காற்றுக்

கோர்வையினைத் தேடுகின்றேன்