நாள் : 13 (13/04/2021)
தலைப்பு : விடியாத இரவில்லை
கருத்தான காவலோடு காலங்களும் மாறித்
தெருவெங்கும் சுற்றிவந்து பார்த்தும் – பெருகும்
கொடிதான குற்றங்கள் கூடினாலும் பாரில்
விடியா இரவில்லை நம்பு
குறையாத கோபத்தைக் கொண்டவர் நெஞ்சில்
மறையாத எண்ணங்கள் மாறும் – கறையாய்ப்
படியாமல் உள்ளத்தில் ஊர்ந்தாலும் மண்ணில்
விடியா இரவில்லை காண்
கருவாகும் மேகங்கள் வானின்று பொய்க்க
உருவாகும் வேளாண் பயிர்கள் - தலைக்க
முடியாத சூழல்கள் ஆனாலும் நித்தம்
விடியா இரவில்லை பார்
கயவர்கள் கண்முன்னே காட்சிதர உள்ளப்
பயம்கொண்டு வாழும் மனிதன் – முயற்சி
படியேறிப் பக்குவமாய் வாழ்ந்தாலும் நாட்டில்
விடியா இரவில்லை பார்
நம்பியவர் நாசமாகி நம்மைவிட்டுப் போனாலும்
நம்முள் இருக்கின்ற மாண்புகளை – தம்முள்
மடியவைத்து தற்காத்துக் கொண்டாலும் பாரில்
விடியா இரவில்லை காண்
கணேசுகுமார் பொன்னழகு.
கருத்துகள் இல்லை:
கருத்துரையிடுக