பிரிவுத்துயர்

கடலாடும் படகிற்கு – நல்ல

      கலங்கரை விளக்காய்

உடல்மனத் திலாடும் – என்

      உன்னத அன்பிற்கு

காதல் கனவில் – ஒரு

      கருவறை ஒளியாய்

ஓதும் ஆலயத்தில் – தினம்

      ஒலிக்கும் வார்த்தையானேன்

பௌர்ணமி நிலவில் – நிழல்

      பதித்த சித்திரம்போல்

அவளின் நினைவில் – தினம்

      அலையும்விசித் திரமானேன்

பகல்பொழுதும் பாராது – நான்

      படுத்துறங்கும் வேளையிலும்

நிகழ்பொழுதை மறந்து – நான்

      நெடுநேரம் மனவானில்

ஜோடிப் பறவையாய் – காதல்

      சூடிப் பறந்து

வேடிக்கை விளையாட்டில் – நித்தம்

      வெகுளியாய்த் திரிந்து

வளர்த்துவந்த காதல்பூ – (மண)மாலை

      வரவுகண்டுதன் நிலைமாறி

உலர்ந்து உதிரக்கண்டு – நான்

      உள்ளம் உருகினேனே