ஆசிரியர்
பள்ளிக் கல்விப் பணியிலே
பாங்காய் சேவை செய்பவர்
நல்லத் தமிழை வளர்க்கவே
நாளும் பயிற்சி கொடுப்பவர்
கல்வி கற்கும் பிள்ளைகள்
கருத்தாய் பாடம் கற்கவே
நல்ல எளிய பயிற்சியை
நாளும் செய்யச் சொன்னவர்
உள்ளம் நிறைந்த மகிழ்வுடன்
உயர்ந்த அறிவுக் கதைகளை
கள்ள மில்லா பிள்ளைக்கு
கனிவாய் சொல்லிக் கொடுப்பவர்
எம்மைப் போன்ற பிள்ளைகள்
ஏற்றம் கொண்டே உயர்ந்திட
இம்மை வாழ்க்கைப் பாடத்தை
இனிதாய் சொல்லிக் கொடுப்பவர்
உண்மை பொய்மை யாதென?
உணர்த்தச் சொல்லும் கேள்வியில்
நன்மை தீமை இவையென
நன்றாய் விளக்கிச் சொல்பவர்
நம்மை உயர்த்த உழைத்திடும்
நல்ல ஆசிரியச் சான்றோர்க்கு
நம்மால் இயன்ற வாழ்த்தினை
நாளும் சொல்வோம் போற்றியே!
கருத்துகள் இல்லை:
கருத்துரையிடுக